รมฺมสุรมฺมสุเภสุ ฆเรสุ, ติณฺณมุตูนมนุจฺฉวิเกสุ; ทิพฺพสุขํ วิย ภุญฺชิ สุขํ โส, อจฺฉริยพฺภุตราชวิภูติํฯ เนกฺขมฺมชฺฌาสยทีปนียมกคาถา ฯ นโม ตสฺส ยโต มหิมโต ยสฺส ตโม นฯ ทิสฺวา นิมิตฺตานิ มทจฺฉิทานิ, ถีนํ วิรูปานิ รตจฺฉิทานิ; ปาปานิ กมฺมานิ สุขจฺฉิทานิ, ลทฺธานิ ญาณานิ ภวจฺฉิทานิฯ ปทิตฺตเคหา วิย เภรวํ รวํ, รวํ สมฺมุฏฺฐาย คโต มเหสิ; มเหสิโมโลกิยปุตฺตมตฺตโน, ตโนสิ โน เปมมโหฆมตฺตโนฯ อุมฺมารอุมฺมารคตุทฺธริตฺวา, ปทํ ปทํ ยาตนราสภสฺส; อลํ อลํการตเรน คนฺตุํ, มตี มตีเวติมนงฺคภงฺเคฯ อุมฺมารอุมฺมารคโต มเหสิ, อนงฺคภงฺคํ สมจินฺตยิตฺถ; กิํ เม ชรามจฺจุมุเข ฐิตสฺส, น เม วเส กามวเส ฐิตสฺสฯ กาเมน กาเมน น สาธฺยโมกฺขํ, มาเนน มาเนน มมตฺถิ กิญฺจิ; มาโร สเสโน หิ อวารณีโย, ยนฺเตน อุจฺฉุํ วิย มทฺทตี มํฯ อาทิตฺตมุยาตปยาตมูนํ, อตาณาเลณาสรเณ ชเน เต; ทิสฺวาน ทิสฺวาน สิวํ มยา เต, กาเมน กาเมน กถํ วิเนยฺยฯ วิชฺชาวิชฺชาย จุตญฺจุเปตํ, อสารสารูปคตญฺชนํ ชนํ; วิชฺชายวิชฺชาย ยุโต จุโตหํ, ปโหมิ ตาเรตุมสงฺคโห คโตฯ มคฺคนฺติ โน ทิฏฺฐิคตาปวคฺคํ, อคฺคา ติ เตวาหุ ชนา สมคฺคา; นคฺคํ อโห โมหตมสฺส วคฺคํ, วคฺคํ หนิสฺสามิ ตมคฺคมคฺคาฯ ปเสยฺหกาเรน อเสยฺหทุกฺขํ, ชนา ชเนนฺตีห ชนานเมว; ปเสยฺหกาเรนา อเสยฺหทุกฺขํ, ปาปํ น ชานนฺติ ตโต นิทานํฯ เต โอฆโยคาสวสํกิเลสา, ตเมว นาเสนฺติ ตโต สมุฏฺฐิตา; เอกนฺติกํ ชาติ ชรา จ มจฺจุ, นิรนฺตรํ ตํ พฺยสนญฺจเนกํฯ จีรํ กิเลสานสมุชฺชลนฺตํ, ทิสฺวาน สตฺตานุสยํ สยมฺภู; สาเธมิ โพธิํ วินยามิ สตฺเต, ปจฺฉาปิ ปสฺสามิ สุตํ สุตนฺตํฯ ตํ ทิพฺพจกฺกํ ขุรจกฺกมาลํ, รชฺชํ สสารชฺชสมชฺชมชฺชํ; เต พนฺธวา พนฺธนมาคตา ปเร, สุโต ปสูโตยมนงฺคทูโตฯ สมุชฺชลนฺตํ วสตี สตีสิรี, สิรีสปาคารมิทํ มหาวิสํ; ททฺทลฺลมานา ยุวตี วตีมา, สกณฺฏกาเยว สมญฺชสญฺชเสฯ ยสฺสา วิราชิตสิรี สิริยาปิ นตฺถิ, ตสฺสาวโลกิย น ติตฺติวสานมตฺถิ; คจฺฉามิ หนฺท ตวนงฺค สิรปฺปเภทํ, มตฺเตภกุมฺภุปริ สีหวิลาสคามิํฯ โภ โภ อนงฺคสุจิร ปิ ปนุณฺณพาณ, พาณานิ สํหร ปนุณฺณมิโต นิโรธ; โรเธน จาปทคโต มนโส น โสจ, โสจํ ตวปฺปนวโลกิย ยามิ สนฺติํฯ รตี รตี กามคุเณ วิเวเก, อลํ อลนฺเตว วิจินฺตยนฺโต; มนํ มนงฺคาลยสมฺปทาลยํ, ตหิํ ตหิํ ทิฏฺฐพาลา ว ปกฺกมิฯ ปาทุทฺธารวิมฺหยทีปนีคาถา |